Perez Iglesias eta Jauregi sailburuek DIPCren instalazioak bisitatu dituzte
Eusko Jaurlaritzako Zientzia, Unibertsitateak eta Berrikuntza Saileko eta Industria, Trantsizio Energetikoa eta Jasangarritasuna saileko arduradun gorenek DIPC bisitatu dute gaur
Juan Ignacio Perez Iglesias Zientzia, Unibertsitateak eta Berrikuntzako sailburua eta Mikel Jauregi Industria, Trantsizio Energetikoa eta Jasangarritasuneko sailburua DIPCren (Donostia International Physics Center) instalazioetan izan dira gaur goizean, Jaione Ganzarain Teknologia, Berrikuntza eta Eraldaketa Digitaleko sailburuordearekin batera. Bisita horretan lehen eskutik ezagutu dute bikaintasun zientifikoaren zentro horretan egiten duten ikerketa-, berrikuntza- eta transferentzia-jarduera, bai eta bertako instalazio estrategikoa ere, Superkonputazio Zentroa.
Perez eta Jauregi sailburuak eta Jaione Ganzarain sailburuordeak DIPCren patronatuko kideak dira eta Pedro Miguel Etxenike presidenteak eta Ricardo Diez Muiño zuzendari zientifikoak egin diete harrera. Eusko Jaurlaritzako bi sailek bat egiten dute fisikaren abangoardiako arloetan eta antzeko diziplinetan DIPCk egiten duen ikerketa-lanarekiko interesean. Halaber, aurrerapen zientifikoak soluzio teknologikoetara eta produktu berritzaileetara eramateko gaitasuna dute.
